قصة ضمها قبرها قبل لايضمها

****أخليكم مع القصه****
>القصه صارت في السعوديه بمنطقة الخرج<
"""عبدالعزيز ونوره"""
بدايه احب اعرفكم على الشخصيات :عزوز ""عبدالعزيز"" و النوري ""نوره"" هم أبطال القصه وخلود أخت عزوز وصديقة نوره وبيت عزوز وبيت النوري جيران يعني بيوتهم جنب بعض وكان صديق عزوز وولد خالته واسمه<بندر>_اللي هو قاص القصه_ واهو عزوز اصدقا الروح بالروحوبيت بندر بعيد عنهم شووي} وهذي القصه حقيقه صارت عام@2006@
*******"نبدأ القصه"******
كان عزوز في عز المراهقه ويموت في شي اسمه النوري ويسوي المستحيل علشان يشوفها وصارت بينهم مواقف كثيره ومضحكه وكان عزوز يخطط دايم للمواقف هذي ومعه بندر وبعض مواقفهم كان عزوز يتحرى اليوم اللي تسوي امه فيه اكل وتقول وصله لبيت الجيران وهو مايصدق على طول جاهز كله لعيون النوري وكان عند عزوز أخت في عمر نوره اللي هي خلود وكانت تعرف ان عزوز يحب النوري موت بس ماقالها بس عرفت من اسئلته عنها مثل:1_ النوري داومت بالمدرسه اليووم؟
2_ النوري ليش طلعت متاخره اليوم من المدرسه ؟؟
3_ <ايام الامتحانات> النوري جاوبت زين بالامتحان ؟؟
ومثل هذي الاسئله وكانت خلود رافعه ضغطه لانها يالله تعطيه الرد طبعا خلود قاصده لانها داريه انه يحبها وعزوز مايخبي على بندرشي وبندر بعد مايخبي على عزوز شي وكان يشتكيله من خلود ومن ظمن مواقف عزوز إنه يتميلح ويترجى أخته علشان توافق انه يوديها للمدرسه على السياره مع انها كانت قريبه ماتحتاج سياره وطبعا مو لسواد عيون أخته كان كله لعيون النوري علشان تروح معهم المهم مرت الايام وسنين وتخرج عزوز من الثانويه والنوري وخلود صاروا في ثالث ثانوي وعقل عزوز وصار رجال والكل يحترمه لاخلاقه وصار طالب بكلية الملك فهد الامنيه اما النوري وخلود حالتهن حاله مع ثالث ثانوي ومن مدرسة عربي لمدرسة انجليزي طبعا مدرسات خصوصيات ومرت الشهور ولامتحانات وجا وقت النتايج النوري تبكي من الخوف اما خلود داجه ومطنشه
النوري: خلود النتايج اليوم
خلود: وش فيه اذا كانت اليوم عادي
النوري: خليده وجع ماعندك احساس ماتخافين لو جبتي نسبه وش بيقولون الناس عنك
خلود: خلهم يقولون اللي يقولون مايهمني احد
النوري:ياربيه منك اقول بس شغلي النت خلينا ندخل الموقع نشوف النسب طلعت ولا لا
خلود:وش موقعه اقول بلا موقع نسب بلا نيله خلينا ندخل دردشه وبس وخلنا نسولف مع الشباب ونضحك ونستانس خلينا نفلها عطلنا يانوره خلاص ماعاد فيه مدرسه
النوري:يابرد اعصابك ياخليده احر ماعندي ابرد ماعندك بالله عليك هذا وقت دردشه خليده والله لو اجيب نشبه زينه لااعشيك عشا على كيف كيفك واخليك بعد على الدردشه اللين تملين بس ادعي اني انا وانتي نجيب نسب حلوه
خلود: اوووووووووه مادام المساله فيها عشا ودردشه يارب نجيب نسبه حلوه مع اني غاسله يدي واحفر ان جبت نسبه زينه
النوري:هههههههههههه ضحكتيني وانا مالي خلق بس ابي اعرف ياخليده وش ذا الحب للدردشه حتى بالامتحانات تدخلينها لايكون تكلمين من وراي
خلود: اعوذ بالله مو لهدرجه يانوره انا مجنونه اكلم انا حدي دردشه وبس مكالمات مستحيل بس والله انها وناسه وفله وتنسيني العالم
المهم اتصل عزوز على أخته خلود وكان معه بندر وطبعا النوري جالسه عند خلود
عزوز: النتايج معي
خلود: والله ياعزوز من جدك تكلم _ماخبرتك مهتم فيني لذا الدرجه ولاعشان النوري اييه الله يرحم حالي محد يهتم فيني
النوري ضربت خلود
[وكان عزوز مشغل السبيكر]
بندر: افا وانا ولد خالتك كلنا تحت امرك
استحت خلود وسكتت
عزوز: اول مره تستحين ياخليده ليتك دوم كذا وتفكينا من لسانك الطويل
خلود: سكر السبيكر والله ماخليك تعال للبيت ياعزيز
بندر مات ضحك وكذلك عزوز
عزوز:قولي لنوري نتيجاتها 95% والف مبروك واما انتي يالداجه 89%
النوري جلست تصيح مو مصدقه وخلود تضحك من الفرحه عشان النوري فرحانه وانتهت المكالمه
خلود&النوري : فرحانات وراحو يبشرون اهلهم وصديقاتهن
اما عزوز & بندر : عزوز يشكي لبندر حاله ويانوره ويقول انا ابس اشوفها بس ما اعرف كيف وودي اتكلم معها بس كيف يابندر ؟؟
بندر ساكت ويفكر في حال صديقه وولد خالته عزوز وقال : جاتني فكره وانا ولد خالتك تبي تشوفها بس ابشر اسمع خطتي ونفذها مثل ماهي
عزوز: والله يابندر تكفى قولها ولا لاانفذها مثل ماتقول
بندر: شوف اليوم اللي بتجي عندكم نوره واذا كان خلود شغلت النت دق على جوال خلود وقول ابي جهازك الكمبيوتر وانتي روحي لغرفتي وشغلي جهازي واستخدميه طبعا خلود بتستغرب بس انت خلك جاد في كلامك معها واذا راحت لغرفتك وشفتها شغلت جهازك دق علي وانا بجي عندك وخل خلود تزين قهوه وشاي وقلها عندي ضيوف بس فيه مشكله

عزوز: وش المشكله
بندر: خدامتكم العله لازم نصرفها لان خلود اكيد يتقول لها سوي القهوه بس كيف انصرفها تعرف انها عله وصاحيه ماينلعب عليها بسهوله
عزوز: ماعليك بخليها تروح لخوالي بس كيف اخليها تروح
بندر: يالليل حبكت على الشغاله أممممممممم لحظه جتني فكره قولها في رساله عند خوالي لك من اندونيسيا وتعرف شغاله وجتها رساله وش بتسوي بطير من الفرحه
عزوز:بنيدر والله انك خطير وبنفذها ونشووف عساها تظبط
بندر: المهم وشرايك ندخل الحديثي مول
عزوز: بيطردونا لانا عزابيه
بندر: ماعليك انا ابو الافكار بعطيهم كذبه
المهم بعد المحاولات من بندر وكذا كذبه دخلوهم الحديثي وكان السووق زحمة صبايا وشباب وعوائل وهات يامغازل ويا بلوتوث من شباب وبنات وبندر مغازلجي درجه اولى وبكل صراحه مالوم البنات لالنه وسيم وحلوو مووت وسكسوكته جنااان
بندر: عزوز ناظر المبرقعه اللي عند هرفي ياويلي ويلاه محلاها بس كيف ارقمها
عزوز: الحمدلله اركد ياولد تونا داخلين لحد يفضحنا قدام العالم
بندر: انا مرقمها _مرقمها الله لايعوق بشر
عزوز: افتح الجوال وشوف الالقاب يمكن تلقى لقبها
بندر : من جدك وين بلقى لقبها بين ذا العالم _ بعدين وش دراك يمكن جهازها مو كميرا
عزوز: قرب من عندها وشوف وراح بندر عندها وقرب وفتح البلوتوث ولقى القاب ومن ضمنها(بدويه ولي الفخر... صحرا نجد ... مزيونة الا فلان ...الفارس ... الجذابه ...الوسيم ... سيده ملعقه ... هلاليه والكل خاضع ليه ) وقام بندر وقرب من هرفي لان البنت واقفه عنده تطلب واخذ يرسل لكذا لقب وكان يتسمع للجوالات لين يفقد الامل وباقي اخر لقب وارسله وصار لقب البنت المبرقعه اللي هو (مزيوووونة .....) وصراحه هي قد لقبها من ناحية الزين والرزه واخذ بندر يتميلح قدامها لكن اللي جنن بندر انها ماعطته أي اهتمام ولاحتى التفتت عليه وصمم بندر انه يكلمها ويعطيها الرقم
بندر: يامزيونه
البنت مانتبهت
بندر:ياحلو انتا
البنت اشكل ماسمعته

بندر: يامزيونة.....
البنت ناظرته
بندر : يلعن ابو العيون محلاها
البنت طنشته وجلست تكلم العامل اللي بهرفي
بندر:ممكن سؤال
البنت: نعم
بندر : أنتي من ألـ فلان
البنت : ايه ليه بغيت شي اوتامر بشي
بندر: لاسلامتك _ ونعم والله با ألـ فلان بس ممكن تاخذين الرقم
البنت: مو معنى اني رديت عليك انك تفهم قصدي غلط اني اخذ رقمك تراني بنت رجال واخت رجال وماهي من سلومنا اخذ الارقام
اما بندر سكت وكبرت بعينه البنت وقال: اشهد انك بنت رجال
البنت راحت ورجع بندر لعزوز
عزوز : بشر رقمتها
بندر : لا بس والله العظيم انها هزتني من داخلي وكبرت بعيني
عزوز: اوف ليه وش صار
بندر:ااه ياعزوز
عزوز: لعنبوك وش صار لاتكون من جماعتنا وعرفتك
بندر: ليتها من جماعتنا او حتى من قبيلتنا
عزوز: وشفيك طيب
بندر: احرجتني بصراحه واستحيت لانها قالت انا بنت رجال وماهي من سلومنا اخذ الارقام
عزوز: بعدي والله حلالاه من يروح ويبوس راسها على كلامها الزين وياحظ اخوانها بها يحقلهم يفتخروون بها
يندر: وازيدك من الشعر بيت طلعت البنت من ألـ فلان لبا ألـ فلان كلهم والله أني حبيتهم بعدها
عزوز: اوف حبيت ألـ فلان كلهم علشان وحده بس والله اني داريه من المبرقع انها من ألـ فلان
بندر: بس لحظه كيف عرفت من المبرقع انها من ألـ فلان
عزوز: أعرف لأن أغلب ربعي من ألـ فلان واذا صادفت اهلهم وسلمت على أمهاتهم هذي مبرقعاتهم
المهم يالحبيب اطلب لنا وجبات علشان نطلع
وراح بند وطلب الوجبات وجلس وياعزوز على الطاوله ويناظرون البنات وراحو يمشون وفجئه وهم يمشون شاف بندر البنت تتسوق واخذ يتابعها من بعيد لبعيد وعزوز عارف ان بندر راح ملح مع البنت
عزوز: بنيدر وش معنى ذا البنت اللي مصر انك ترقمها وتتبعها
بندر: بعض البنات سهل انك تعطيها الرقم وتاخذه وبعضهن صعب وانا احب البنت الصعبه وذا البنت جذبتني بثقلها ياخي مع اني مزيون ودايم البنات يذوبن اذا رقمتهن وياخذن الرقم على طول والا هذي ماخذته
عزوز: اخس يالثقه من شافك قال توم كروز بس اصابع يدك وانا اخوك ماهي مثل بعض والبنات بعد في الصاحي والطاحي
بندر: صدقت والله اني احلى من توم كروز اقول يالله مشينا مع اني قلبي مايطاوعني اخليها واطلع
عزوز: ابك وش بلاك من شافك قال تعرفها من زمان ترى اول مره تشوفها انت ووجهك
بندر: على قولتهم الحب من نظره وانا اخوك
عزوز: يالله بس امش
وطلعو من الحديثي مول ونوره وخلود من لقاهن من عزيمه لعزيمه وجا اليوم اللي بنفذ عزوز خطت بندر وفعلا نفذها ونجحت

دخل على نوره وهي جالسه على كمبيوتره بغرفته وتسمع قصايد لسعد علووش مخزنها عزوز بجهازه وهي مندمجه بسماعها ولا نتبهت لعزوز وجلس يناظرها ويتاملها ولا تكلم وجلست تناظر نوره صورت عزوز على طاولته وقالت : ااه ياعبدالعزيز لو تدري وش كثر أحبك ...؟
هو سمعها ولا ماسمعها عزوز وطار يركض لبندر وجلس يحبه
عزوز: بندر قالتها يابندر
بندر: ابك وش بلاك لعنبو دارك من هي اللي قالتها وش سويت انت وش السالفه _خلاص لعاد تحبني _ فهمني ياطر جيبي طرااه
عزوز: انا دخلت على نوري بغرفتي وقبل لادخل قلت خلني اتاملها وفجئه جلست تناظر صورتي وسمعتها باأذني تقول اه ياعزوز وش كثر أحبك والله قالتها يابندر والله والله
بندر: ابك خلاص والله مصدقك بس اقص ايدي اذا منت توك حاط الصوره متعمد علشان تشوفها نوره صح ياعزيز
عزوز: تدري ليش احبك يابندر لانك اكثر واحد فاهمني يا عز الخوي
بندر: المهم اللحين لاعاد تاذيني انت ونوره خلاص عرفت انها تحبك بس انا ؟؟
عزوز : بس ايش
بندر : ابي ذيك البنت
عزوز: ابن ابوي يندر للحين مانسيتها
بندر: مانسيتها ولا اظن بنساها بعد
عزوز: ياخي اقسم بالله يابندر انك غريب على كثر البنات اللي تعرفهن وتقلب روسهن لين ياخذن الرقم معقوله وحده ماقدرت عليك
بندر: انت تشوف ياخي لارقمتها ولا نسيتها
عزوز : اقول انساها ما ظن تشوفها مره ثانيه
بندر: وجع عزيز لا تحطمني يمكن نتلاقى مره ثانيه
عزوز: ايه قابلني ان لقيتها بنات الخرج وش كثرهن وألـ فلان واجد ماشاالله من جدك بتلقاها بين ذا الناس مره ثانيه
بندر: اقول لايكثر حكيك وامشينا نطلع
عزوز: والقهوه قلت لخليده تزينها
بندر: ياخي القهوه علشان تشوف نوره ولا انا ماابيها
عزوز: الله يلعن خيرك وش بتسووي خليده وش بيفكني من لسانها الطويل ياليل
بندر: قل لها الضيف راح _لا_لا _ لحظه اخاف تدعي علي واروح فيها عطها ارنب من عنك
عزوز: توكلنا على الله واللي يصير يصير
بندر: اقراء المعوذات _هاهاهاها
عزوز: حشى داخل على وحش انا

المهم راح عزوز لخلود
عزوز: خلود خلاص لاتزينين قهوه مانبيها
خلود:وشو_ وشو_ وشو_ ليه على كيفك اللحين مناديني وزيني قهوه وعندي ضيف ومخليه النوري لحالها بغرفتك واخر شي ماتبي قهوه اقول مالت عليك وعلى ضيفك
وراحت خلود وهي تحلطم وضايقه عزوز استانس لانه انتهت السالفه على خير وراح عزوز لبندر وهو ميت من الضحك علشان خليده وقاله السالفه كلها وجلس يضحك بندر وراحو سوق صحارى يلفون على السياره ومشغلين المسجل اغنية:
ثلاث ايام مرت في حياتي غير
ثلاث ايام عشت الحب ...

لعبد المجيد عبدالله .عزوز هو اللي يسوق وبندر يرقص الولد طربان ويبي ينسى الحديثي والبنت اللي فيه وعزوز اجودي ماهو راعي مغازل والمسجل مشغله بندر وده يقول نوع السياره بس خايف لا يشتهر وينفضح عند جماعته
ويكمل بندر القصه
عاد اللحين العطله الكبيره والدجه والوناسه فيها والسفريات نوره واهلها وخلود واهلها وبندر واهله [للمعلوميه بندر اوسط اخوانه واكبر منه واحد وماعندهم الا اخت ومدلعينها اخر دلع اما نوره اكبر اخوانها واصغر منها ولدين واما خلود وعزوز هم وحيدين اهلهم] بالعربي العوائل الثلاث قرروا يسافرون لابها ويجلسون اسبوعين وتحدد يوم السفر وصار يوم الاربعاء وبالفعل سافروا لابها وعاشو اجمل اللحظات عزوز وبندر ونوره وخلود والشيبان والنسوان وعزوز عايش جو مع نوره لعبته يناظرها على كيف كيفه اما بندر جالس ومحظر للمغازل ويتصيد البنات واخته لميا عمرها(5) سنوات معه يلعبها بالالعاب وهو قلبه مع البنات وعزوز يلعب اخوان نوره (عبودي&نواف واختها جود) يتميلح عشان تشوفه نوره بس الجد انه يحب اخوانها لانه ماعنده اخوان ويعتبر اخوان نوره اخوانه وياهو صار لهم مواقف بتروح سنين وتجي سنين ونوره وخلود ماراح ينسونها لانهن سبب المواقف
كانت نوره جالسه وخلود راحت تجيب اس كريم لنوره ولها وفجئه مرو شلة شباب على نوره وقطو الرقم وقطو كذ كلمه عليها وجات خلود عاد خلود ملسونه
خلود: خير انشأالله ماتستحون على وجيهكم
واحد من الشباب جرئ ويرد عليها
المغازلجي: لا مانستحي في شي
خلود: حلوه في شي جاي تغازل وتقط الرقم وتقول فيه شي ياقليل الدب صدق وقاحه
نوره:خلود خلاص خلينا نروح شوفي الناس تجمعوا لاتكبرين السالفه
المغازلجي: اروح ملح معك انتي يالثانيه (يقصد نوره)
خلود : يالله بس ضف وجهك وشلتك وانقلع يالتافه
وكان عزوز وبندر يتمشون وشافو الناس مجتمعين وحبهم للفضول راحو وبغى ينجن عزوز ولقى اخته ونوره وبندر فيه حميه وغيره مو طبيعيه
عزوز : خير وش عندك انت وياه
المغازلجي: انت اللي خير تدافع عنهن ولا اعجبتك واناوي ترقمهن وتسوي نفسك رجال يابطل علشان يمدحنك
بندر: اقول حسن الفاظك للعن خيرك وحنا اذا قلنا فعلنا يالرخمه
المغازلجي: ورني وش بتسووي انت وياه
عزوز : نوريك ابشر
وتهاوشو الشباب وحصلت مضاربه وتجمهرو ناس كثير وكل ماحس بندر ان عزوز تعب اخذ ينتخي بندر وعزوز مع العزوه نسى الوجع ونوره وخلود يبكن وخاصه نوره تصارخ لانها ماتحب الهواش والمغازلجيه تقريبا خمسه وبندر وعزوز لحالهم ونوره تبكي والناس حاولو يفكون المشكله ولا قدروا بس عزوز وبندر العنو خيرهم وضربوهم ضرب الين عافو المغازلجيه الدنيا وبيحرمون يغازلون مره ثانيه وراحت نوره تمشي ومسكت عزوز وتقول : تكفى خلاص عزوز وتبكي وتدخلت الشرطه وفكت الهواش ولا تنازل عزوز وبندر الا اللين اعتذروا المغازلجيه منهم وانتهت المشكله

عزوز: بنيدر شفت وش صار من المغازل احذر لايصيرلك مثلهم
بندر: هاهاهاهاها هذولا عليميه انا خبره بس والله أني مرهق يديني تعورني وخاصه من الدب
عزوز: سلامتك بس كل ماتذكرت يومك ماسك ابو شعر بيد والدب بيد اجلس اضحك
بندر: افا عليك ولد خالتك خطير
عزوز: شفت نوره يوم مسكتني ياربيه والله موقف رووعه
بندر: والله انك فاضي اقول شف ثوبي من اختك حاستني وبس
عزوز: ليه وش سوت خليده وش ذا
بندر: معها ايس كريم ومع الهواش وهي تبكي قطت الايس كريم تبي تقطه على الولد ابو شعر الا الايسكريم في ثوبي ووجهي
عزوز: هاهاهاها بس والله موقف مستحيل ينسى
بندر: ولا فيها اكيد علشان نوره مسكتك
عزوز: يالله مشينا
وراحو للفندق وبدا التحقيق من الاهل وش صار وليش وكيف واسئله مالها نهايه وخاصه الحريم اووووم اللي تبكي واللي تعطيهم ماي وعصير وعزوز وبندر عورتهم روسهم من كثر الحكي وراح كل واحد لغرفته ونام ونوره وخلود يضحكن

لانهن هن اساس المشكله ومرت ايام وناسه ومواقف حلوه.......... ورجعوا للخرج.........
ونوره قدمت في الكليه لغه انجليزيه وقبلوها واما خليده رافضه انها تدخل الكليه تبي تجلس بالبيت وعزوز ياجازه من كليته وبندر عاطل عن العمل ابوه يبي يوضفه لكنه رافض ودايم كلمته لابوه: خلني استانس يايبه لاحقين على الهم والشقا
وقرر عزوز انه يخطب نوره وبالفعل خطبها ووافقو اهلها وتمت الخطبه وتحدد زواجها بعيد الفطر وبندر مستانس علشان صديقه واخوه وحبيبه وولد خالته بيتزوج اما خلود فرحتها فرحتين علشان اخوها الوحيد بيتزوج والفرحه الثانيه ان العروس صديقتها ونوره وعبد العزيز محد حاس بالفرحه اللي عايشينها بعد الحب دام لمدة اربع سنوات ولكن آآآآآآآآه يالقدر صدق من قال (نمشي على كف القدر ولا ندري عن المكتوب" عباره كانت ارددها صدق من صاغ معناها)
المهم كان عزوز يحضر لامتحانات اخر مستوى وبعدها يتخرج أما نوره كانت اول سنه كليه واتفقت مع عزوز عن طريق ابوها انها ماراح تترك الدراسه وراح تكمل بعد الزوج وطبعا كلهم يحسبون الايام والليالي لا زواجهم كان ثاني ايام عيد الفطر وكان عزوز عنده اخر إمتحان وكان يوم الثلاثا وكان عزوز قاعد يراجع ودق عليه بندر
بندر:هلا_ عزوز هاه وش سويت
عزوز: هانت _ابشرك كله بس امتحان بكره وبعدها التخرج وبعدها ـــ
بندر: كمل وش بعدها استحيت هاهاهاهاهاها بعدها النوري صح على العموم الله يوفقك
عزوز: وانت بعد تصدق بندر والله احسب متى يجي اليوم بشوف نوره فيه
بندر: بيجي ياولد ان شاءلله يالله ذاكر زين ومع السلامه
عزوز: مع السلامه يالحبيب
وجلس عزوز يراجع الين قبل الفجر وغفى شوي وبعدين صحى وهو خايف لانه يقول وانا نايم أحس لسي غريب حلم مو حلم كأني اشوف نااار وفيه صوت وصراخ المهم يوم ناظر الساعه الا هو متاخر لان وراه مشواار من الخرج لرياض وبعدين الحبيب ركب سيارته ومشى وكانت الساعه _خمس ونص _ وبعدين اتصلت عليه خليده وكانت تساله عن مفتاح غرفته لان على قولتها عاطله وتبي طقطق على النت شوي لان جهازها عطلان المهم وافق وسكرت ............وهنا حدثت الكارثه اللي حطمت الجميع ......................
بيت نوره واهلها__ صحت نوره من النوم عشان الكليه وخذت شاور وجلست بغرفتها في الدور الثاني واما اخوانها الصغار وامهم بالدور التحتي وكانت امهم تنتظر الباصات علشان يروحون عيالهم للمدرسه وابوهم طلع للدوام وكانت نوره مقفله عليها غرفتها وكانت بغرفتها توصيله وشابكه فيها كذا فيش وفجئه وهي تعدل شعرها انفجرت التوصيله وطلع دخان وكانت نوره تصارخ وتحاول تفتح الباب لكن ماقدرت وطلعت من الشباك لان الدخان كتمها وامها ماتدري وش صار ولاخذت امها الا الخدامه تقول مدام غرفة نوره كلو دخان وراحت امها تركض فوق حاولت تفتح الباب لكن الباب ماانفتح واخذت تصارخ وبسرعه وانتشر الحريق بالدور الثاني وتجمعوا الناس واتصلوا بالدفاع المدني وحضروا وطفوا الحريق اما خلود كانت تصارخ لانها ناظرت من الشباك الدخان طالع من غرفة نوره وفجئه وهي تركض طاحت على التلفون وانعاد الرقم على عزوز لانه اهو اخر رقم دقت عليه واخذ يسمع عزوز صراخ ولايدري وش السالفه واتصل عزوز على بندر يساله وش السالفه وقاله بندر ورجع عزوز بدال مايروح لرياض ويمتحن اخر امتحان رجع للخرج وبسرعه جنونيه اما خلود و اهلها والناس واقفين ينتظرون نوره وامها كانت مجنونه وبعد ماكسروا الباب على نوره لقوها جثه طايحه ولكن مافيها اثار حريق الدخان هو اللي كتمها وراااااااااااااااااااااااااااااااااااااااااااحت
نـــــــــوره الحبوبه
نـــــــــوره الدلوعه
نـــــــــوره الخجوله
نـــــــــوره حبيبة عبدالعزيز
يــــــــــــــــــــــــــعــــــــــــــــــــــ ـــــني
_ماااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااتـــــــــــت _
طلع واحد من اللي طفو الحريق وقال : ادعولها ماتت
بندر اخذ يترحم ويدعيلها خلود اغمى عليها ام نوره من الصعب اوصفلكم حالتها تخيلو ام وفقدت بنتها الكبيره والوحيده لان ماعندها الا ولدين وبنت والنوري اكبرهم ووصل عبدالعزيز ولايدري وش السالفه صاير عالم وناس وحريق وشرطه وأسعاف وصرااخ وواجه بندر لان بندر عارف ان عزوز اذا درى ان نوره ماتت يمكن يموت معها ولقى سيارة الاسعاف واقفه وبجنبها سرير ومغطى ولايدري مين وراح يركض عزوز وفتح الغطا الا اهي نوره وضمها ويبكي ويصارخ بحرقه وماعللى لسانه الا ليش يانوره ليه ليه ..وبندر يهديه
اوووووه الولد مافي أمل يهدى تخيلو أنسان فقد حلم عمره يصارخ ويركض في الشارع مايدري وين يروح كأنه طفل يقوم ويطيح
مريت أنا بديارك والناس مجتمعه
صوت وصريخ بدياركم واسمع انين

مات الحبيب اللي صورته في البال روعه
راح وتركني بدنيتي كني طعين
يالله انا مالي بشوفكم طمعه
مير اللي حايل بيننا اقدار السنين
(والله تنطبق على عزوز)
المهم نقلو نوره وامها للمستشفى لكن القدر كان اسرع وللاسف حالت امها كانت تعبانه .. وكذالك الصدمه كانت كبيره لابوها
اماعزوز مو مقتنع ولا هو مصدق ان نوره ماتت واللي يذبح كان في يوم المقبره يوم نزلوا المرحومه في قبرها وانتهى الدفن ظم بندر
بقووه وهو يبكر ويقول (((تكفى يابندر ظمها قبرها قبل لا أظمها)))وبندر ماعرف يرد عليه لانه تاثر من كلامه وبكى لانه عارف وش كثر عزوز يحب نوره ....والحين مر على السالفه شهوووور لكن يقسم بندرقسم ان اللي يشووف عزوز يقول ان وفات نوره امس مو من ثمان شهور واهو معه على طوول وصار عزوز ياخذ علاج نفسي والحين يدعي بندر( من كل قلبه ان الله يثبت ويقوي عزمه ويعافيه) صحيح عزوز ماراح ينسى نوره لكن اللي يتمناه بندر انه يعيش على ذكراها ولو انها ذكرى مؤلمه لكن وش نسوي هذا حال الدنيا وياصدق اللي قال
""""على كف القدر نمشي ولا ندري عن المكتوب""""
وبالنسبه للي كتب القصه اللي اهو بندر ( كان يفكر انه يحب يعني يعيش قصة حب لكن بعد اللي صار مع عزوز حرم على نفسه مجرد التفكير بعد )

هــآآآ ابــي ردودكـــم علــى القصــه ..

والله انــآآ بالنسـبــه لي حــلــو و يجــنـن..

اف والله احزني عبد العزيز...يوم نوره حبيبته ماتت

يسلموو خيتوو على القصه المؤلمه..

مشكووووووووووووووووووووووووووووووورهـ ميمي

القصه روووعه وتكسر الخاااطر

وااء

واااااء

وااء

مشكوره اختي